HAGAR LE ISHMAEL
(Genesis 16:16)
By Samuel L Songate
A Chanchin tlângpui: Abram chu Pathienin malsawm ding le chi tam tak thlatu ni dinga a ko anthawk kum 10 zet an vawi hnung khawm chun nau a la nei chuong nawh a. A nuhmei Sarai beidawngin a suoknu Aigupta mi Hagar hmanga nau nei dan ding a ruohman a. A beisei ang ngeiin Hagar chun Abram anthawkin nau a pai nghal a, sienkhawm a pi Sarai chu a hmusit tah a. Chu phing leh Sarai chun a suoknu Hagar chu a sukrimsi tah a. Hagar lung tuorlo chun a pi Sarai kuoma inthawk chu a tlanhmanga, sienkhawm Pathien Vantirkoin thlalera tuikhur umna hmunah a lo intuokpui a. A rimsiknahai hriet a ni zie le a thlahai chu tiemsenglo rak khawpa tam an ni ding zie thu a tiem hnungin a pi Sarai kuoma kir nawk dingin a hril a.
Hi taka Pathien Vantirko (angel of the Lord) hin, “…I thlahai chu tiemsenglo rak khawpa tamin sukpung ka tih” a ti hin hin ‘ka’ a hmang tlat leiin vantirko narân niloin ama Pathien ngei a nih. Chuonga ama hmutu Pathien a hmu lei chun Hagar chun chu lai hmun chu Beer La Hai Roi (a mi hmutu Pathieng hring tuikhur) ti an bûk a Chuong chun Hagar chu a pi kuomah a kîr nawka, naupasal a neia Pathien Vantirkoin a hril ang takin a hminga chun Ishmael a sak tah a. Ishmael ti chu ‘Pathienin a (rimsikna) hriet’ tina a nih.
Life Application:
$ Sarai in Abram kuomah “Lapa’n nau a mi lan nei tir naw a nih. Fe la, ka suoknu Hagar saw va zalpui rawh; ama fethlengin sungkuo kan din thei rawi mawh” a ti hin, nau la’n neitir naw tu chu Pathien a nih ti hre zingin ama remhrietnaa nau nei hrim hrim a tum ti ei hmu. Ei hringnun a khawm hin Pathien rem ti hma annawleh Pathienin a mi pek hma hmaa malsawmna dawng ei tum chun Sarai ang hin ei buoina ding mei mei ei chawk suok ding a nih. A tawi zawngin, mi po po ringnaa nu ding Sarai chu a ringna fie in a um a, a fail let der a nih.
$ Sarai a remruotna chu Abramin a remtipui a. NIV chun “Abram agreed to what Sarai said” a tih a, KJV ruok chun “And Abram hearkened to the voice of Sarai” a ti ve thung a. Chu umzie chu Abram hin a ko tu Pathien rawl nekin a nuhmei Sarai rawl a ngaithlâka a zui lem tina a nih. Ringnaa ei kalchawina a hin Pathien rawl neka ei nuhmei/pasalhai annawleh ei ruol le pai le ngaizawnghai rawl ei ngaithlâk lem châng a lo va tam awm de aw! Thil ṭha tak angin inlang hlak sienkhawm a tawp chu buoina tho a nih.
$ Sarai a thil thaw hi thil âwmnaw hul huol chu a ni nawh. Hagar kha a suoknu a ni leiin Hagar a nau khawm kha dan ang takin Sarai a nau ding a nih. Thuthlung Hlui hun lai khan mani suokhai hmanga nau nei hi an lo chîng hrim a nih. Jakob a nuhmei Leah le Rakil khawm khan a hnungin an hung thaw ve. Sienkhawm mihriem ngaia le society ngaia thil âwm nazawng hi Pathien remruot a ni vawng kher nawh ti hriet a ṭha.
$ Pathien Vantirko in Hagar kuoma, “..naupasal nei I ta, a hming dingin Ishmael I sak ding a nih, Lalpa’n I rimsik tuor a hriet leiin” a ti hin Pathien hi mi rimsi le sukrinumna tuorhai hre hlak Pathien a ni zie chieng takin an lang. Exodus 3:7 ei en chun Pathienin Mosie kuomah, “Aiguptaa ka mi Israelhai rimsikna chu ka hmu a. An beidawng inrûm ri khawm ka hriet..” a lo ti bawk a. Chuleiin Pathien hi mihriemhai rimsikna hmu tu le beidawng inrûm ri hre hlak tu Pathien a nih. Vawisun hin tu hriet phak loin khawlai kila manih I insung, sin thawna hmun annawleh lekha inchûkna hmunah rimsikna le sukrinumna tuora lungngaia inrûm tlawk tlawk châng a lo um a ni khawmin Pathienin I rimsiknahai a hmu a, I beidawng inrûm ri khawm a hriet zing a nih ti hi theinghil ngai naw rawh.
$ Pathienin Ishmael chung chang thu, “Ama chu ram sabengtung anga kawlh ning a ta, mitin el chu do a ta, mitinin ama khawm chu do veng an tih..” tia a lo hrillawk ang charin khawvel histawri ei thlîr chun Ishmael thla Arab hai khu an kawl le kienga ramhai indopui naw ram an nei ta nawh. Hi hin Pathien thu indik zie le Pathien hi iengkim chunga thuneitu le roreltu (Sovereign God) a ni zie a suk chieng hle.
Thutlângkawmna:
Abram le Sarai hin anni felna le an ringna hrât leia Pathien thutiem le malsawmnahai kha an hlaw dawk ding nisien chu an hlawsam chieng hle ding a nih. Amiruokchu a ko tu Pathien ringumna leiin anni ringum loin umhai sienkhawm thutiem nau Isaac chu pekin an um a, Pathienin anni fethlenga a thiltum le thutiem chu a la hlen tho tho a nih. Tiemtuhai, eini ringumna le ringna ah innghat loa, a mi kotu ringumnaa ei innghat zing theina dingin Lalpa’n a thu mal sawm raw se!
