UK a Kristien ha’n sukdudana tuok zing
Britain rama Kristien MP (Member of Parliament) pakhat David Simpson chun Kristien sukdudana hi ram danga ei hmu le ei hriet hai chauh hi an ta nawh, ei khaw tuola ngei khawm hin nitinin a um zing a nih tiin a hril. A hril dan chun, “UK a hin a nuom taphawtin Kristien sakhuo le Isu hming hi an hrilsieta, amiruokchu Islam ruok chu tukhawmin an hrilsiet ngam nawh” a ti a nih. Kha hma met khan company pakhat Wakefield District Housing hai chun an company motor khaltu Colin Atkinson in a motor hma laia Cross lim a târ chu sakhuo dang zuituhai in ngaitheinaw pal an tih tiin la thla dingin an hril a. Hieng lai zing hin hi company a thawk ve tho Muslim pakhatin an company motor sunga Islam sakhuo lekhabu Koran thumal a târ chu an an phal pêk ve thung. Hi le inzawm hin Atkinson khawm hin thei tawpin company dan a bawsiet naw thu thangsanin a dikna a nawr ve a, a tawpah chu Cross lim sie chu an phal pek ta khawng khawng a nih.
Chris Tomlin in Top Christian Artist Award dawng
Liemtah May 22 zana 2011 Billboard Music Awards semna a chun Gospel singer inlâr Chris Tomlin chun Top Christian Artist Award a dawnga, chun ama hla vêk “Our God” khawmin Top Christian Song a lâk a nih. Kum bul lai deu khawm khan a hla ‘Our God’ hi Grammy Award a dinga nominate a lo ni tah a, sienkhawm kha tum khan lawmman a dawng naw a nih. Amiruokchu tukuma 42nd GMA Dove Awards a khan hi hla bawk hi Best Worship Song of the Year a puong a nih.
Steven Tyler a ex nu in tawngtai pek
Rock star inlâr le tuta season a American Idol Judge ni lai zing Steven Tyler a ngaizawng hlui Julia Halcomb chun Tyler a piengthar na dingin a tawngtai pek zing thu a hril. 1973 khan Julia Halcomb hi kum 16 mi chauh a la ni laiin Steven Tyler le hin lo inngaizawng in, nau khawm a pai nghe nghe a. Amiruokchu a naupai thla 5 vel chauh a ni laiin Tyler hin a nuom naw sa in sukthla dinga a nawr bakah, a sukthlak nuom naw chun a nuhai in tienga kir dinga an thi leiin Julia hin nausukthlak chu a lo remtipui tah a nih. Holcomb hril pei dan chun hienga abortion an thaw lai hin Tyler chun cocaine a thaw pumin a khum bulah a nghak zing a nih. Holcomb hin a thil lo thaw chu an sir thu nasatakin a hrila, kha naute hringna san thei tu chu kei chauh ka nih a, sienkhawm ka lo san zo naw kha na ka ti hle a nih tiin a hril a. Chun hi bakah hin tukhawm kei a anga abortion lo thaw ta hai chun ka chanchin anthawk hin Pathien lungsenna le rorelna nekin Pathien lunginsietna le suol ngaidamna hi chang ve hai sien ka nuom tak zet a nih tiin a hril sa bawk.
Justin Bieber tatoo in hril hlaw
Tulaia pop star inlâr le Billboard Music Awards paruk lai dawng tah Justin Bieber in a vawi tieng awm hnuoi laia Hebrew tawnga YESHUA (Jesus) tia inziek tattoo a nei thar chu mitamtakin an sawisel. Leveticus 19:28 a “Do not cut your bodies for the dead or put tatoo marks on yourselves” (NIV) ti an ziek leiin Kristien tamtak chun tattoo hi Bible leh an kal tiin an sawisel a nih. Hieng lai zing hin Anaheim, California-a Pastor pakhat Kyle Steven Bonenberger chun Bieber a tattoo hi a ringna inentirna tha tak a ni lem tiin a lo kawmen ve thung. Hi pastor pa hin a hril pei dan chun Leveticus in a hril tum tak chu thil thanaw le cult tieng pang le inzawma tattoo nei a tha nawh tina a ni lem tiin a hrila, amiruokchu Kristien thalai hai chu tattoo in lo dit a ni khawmin in nu le pahai phalna la zet unla chu chun nei cho ro tiin a hril.
American Idol thar in Pathien kuomah lawmthu hril
American Idol Season 10 winner tleirawl kum 17 mi Scotty McCreery chun mipui hmaah “Pathien kuomah lawmthu ka hril phawt a nih, hi chen hi a mi’n tlung tir leiin” tiin a lawmman lâk le inzawmin Pathien kuomah lawmthu a hril a nih. McCreery hi Kristien tha tak niin a ringna khawm an zapui naw a nih. American Idol contest-a a thang hma khawm hin an khawmna biekin Garner, North Carolina-a First Baptist Church a khawm hla tieng a thei tawpin a lo inhmang hlak a nih. A lawmman lâk zan hin Tim McGraw leh duet in ‘Live Life Like You Are Dying’ ti hla an sak chun mi lungril a tawk hle. Hi bakah hin hi contest a finalist Kristien ve tho Lauren Alaina in ‘Like My Mother Does’ ti hla a sak lem chun mi lungril a tawk hle a, lawmman dawngtu Mc Creery meu khawmin ka mit ah mitthli a parawl kuong el a nih tiin a hril. Tuta tuma American Idol Season 10 final a khan ‘Christian character’ in hmun a chang insang hle.
